Écoutez Maria Casarès
Adieu aux dames de la Court
Adieu la Court, adieu les dames,
Adieu les filles et les femmes,
Adieu vous dy pour quelque temps,
Adieu vos plaisans passetemps;
Adieu le bal, adieu la dance,
Adieu mesure, adieu cadence,
Tabourins, haulboys, violons,
Puis qu’à la guerre nous allons.
- Adieu les regardz gracieux,
Messagers des cueurs soucieux;
Adieu les profondes pensées,
Satisfaictes ou offensées :
Adieu les armonieux sons
De rondeaulx, dizains et chansons;
Adieu, piteux departement,
Adieu regretz, adieu tourment,
Adieu la lettre, adieu le page,
Adieu la court et l’equipage,
Adieu l’amytié si loyalle,
Qu’on la pourroit dire royalle,
Estant gardée en ferme foy
Par ferme cueur digne de roy.
Adieu ma mye la derniere,
En vertuz et beauté premiere;
Je vous pry me rendre à present
Le cueur dont je vous feiz present,
Pour en la guerre, où il faust estre,
En faire service à mon maistre.
Or quand de vous se souviendra,
L’aiguillon d’honneur l’espoindra
Aux armes et vertueux faict.
Et s’il en sortoit quelque effect
Digne d’une louenge entiere,
Vous en seriez seule heritiere.
De vostre cueur donc vous souvienne
Car si Dieu veult que je revienne,
Je le rendray en ce beau lieu.
Or je fais fin à mon Adieu.
Marot-Les ÉPÎTRES
