Portrait de Clément Marot par Corneille de Lyon (vers 1536)
Écoutez André Reybaz
DU BEAU TÉTIN
Tétin refect plus blanc qu’un œuf,
Tétin de satin blanc tout neuf,
Tétin qui fais honte à la Rose,
Tétin plus beau que nulle chose !
Tétin dur, non pas Tétin, voyre,
Mais petite boule d’Ivoyre,
Au milieu duquel est assise
Une Fraize, ou une Cerise,
Que nul ne voit, ne touche aussi,
Mais je gage qu’il est ainsi;
Tétin doncq au petit bout rouge,
Tétin qui jamais ne se bouge,
Soit pour venir, soit pour aller,
Soit pour courir, soit pour baller,
Tétin gaulche, Tétin mignon,
Tousjours loing de son compaignon,
Tétin qui portes tesmoignage
Du demeurant du personnage.
Quand on te voit, il vient à mainctz
Une envie dedans les mains
De te taster, de te tenir.
Mais il se fault bien contenir
D’en approcher, bon gré, ma vie,
Car il viendroit une autre envie.
O Tétin, ne grand, ne petit,
Tétin meur, Tétin d’appétit,
Tétin qui nuict et jour criez :
« Mariez-moy, tost mariez ; »
Tétin qui t’enfles et repoulses
Ton gorgerin de deux bons poulses !
A bon droict heureux on dira
Celluy qui de laict t’emplira,
Faisant d’ung Tétin de pucelle
Tétin de femme entière et belle !
1535
